DANGOAD

Foto gentañ

D’an 22 a viz Mezheven e oa un abadenn gaozeal aozet get Olier BERSON, animatour ha kelenner àr ar brezhoneg evit Kerlenn Sten Kidna, barrek àr an arzoù a vremañ.
Gweladennet hon doa an diskouezadeg "Dangoad" get ar c’hizellour Ladislas COMBEUIL, e chapel ar Spered Santel, en Alre.
Ganet eo an arzour-se e Gwened. Implijout a ra koad plaket evit sevel e oberennoù.
Mes, petra zo dindan ar c’hoad ?

Peder renkad panelloù bihan a zo heñvel doc’h ex-votoioù staget doc’h ur vangoer, er penn kentañ. Pe ur preder a-ziàr al livadurezh eo marse ? Implijet en deus Ladislas COMBEUIL ur rabot evit lemel tammoù, ur vrikerez ha gwernis goude. Dindan ar gwiskad kentañ e vez gwelet ar peg ruzdu. Setu perak eo lesanvet an diskouezadeg get ar c’hoari gerioù "dangoad".
Àr-lerc’h e laka pevarzek panell vras, labouret er memes mod evel ar re vihan, da soñjal e arsavioù hent ar groaz.
E-kreiz eh eus ur pikol bern tammoù koad roget, lamet ag ar plankennoù.
Meur a baravel a denn da werennoù un iliz. Graet int get teir fanell vras rabotet ha troc’het goude get un heskenn lammer. Stummiñ a reont ur seurt mil-hent-dall  hag a zegas betek ur chapel sklêrijennet get gouleier. En hentad-se e vez kuzhet ha gwelet an arvestour àr un dro.
Penaos deskriviñ oberenn Ladislas COMBEUIL ? Evit diverriñ, ur meskaj eo etre livañ, kizellañ ha sevel tier, get ul lodenn vras a fent.

Dedennus eo sellet doc’h krouadennoù an arzourion ha komz etrezomp diàr o fenn. Pep hani a lâr e soñj.

Eilvet foto

 … hag evit achu : ur banne àr leurenn un davarn, dindan an disheolierioù goude ar valeadenn en dangoad.

← Munud ag ur banell vras

Vakañsoù mat da dout an dud ha ken an distro e miz Gwengolo get avanturioù nevez !

Corinne JEAN
Eilvet sekretourez